هلوووو وصلنة الاخر مدونة بالتحدي
فبما انو هاي اخر مدونة خلي اعرفكم عن نفسي أكثر
( اني ضحى من الحلة عمري ١٨ سنة // مرحلة اولى :- بالكلية التقنية الهندسية / قسم اتصالات).
شاركت بهذا التحدي لترجمة كتاب من اللغة التركية إلى العربيه بديت باللغة التركية من الرابع اعدادي تقريبا حبيت لغتهم وطريقة كلامهم من المسلسلات فبديت اتعلمهة عن طريق اليوتيوب إضافة إلى مواقع وبرامج ومن الاغاني فكلش تعلقت بيهة بحيث اشكد ماجنت أخذ وقت بدراستي الهة جنت مااحس بالوقت جنت حتى إذا اضوج أو شي اروح اقرأ تركي طبعا جانت المسلسلات الها دور كبير بتقدمي باللغة فمنشفت التحدي وشفت جائزتة روحة التركية لان صراحة من احلامي انو اروح التركية وأشوف شوارعهة والمناطق مالتهم واصعد على جسر البسفور وخصوصا ازور منطقة حي بلاط لان تصور بيهة افضل مسلسل تركي عدي اضافة انو امارس لغتي التركية ويه متحدثيهة الأصليين وهذا اهم شي طبعا فحبيت اتحدى نفسي بشي اكبر من تعلم اللغة واخذتهة فرصة حتى هم اطور من لغتي واجرب نفسي ولي هية الترجمة جانت البداية نوعا ما صعبة لان الترجمة مو متعلقة بس باللغة الي أتريد اترجمهة لازم ايكون عندك معرفة بقواعد اللغة العربية لغتك وهو أهنأ واجهت صعوبة لان اني صراحة مو كلش باللغة العربية وقواعدها وكذااا
بس بستعمالي للقاموس كدرت اتغلب شوية عل هذا الشيء والحمد الله ترجمت الي كدرت علي خلال هذي ال٢٩ يوم وصراحة جانت ايام ممتعة تعلمت اهواي شغلات خلال هذا التحدي وتعلمت انو ماكو شي مستحيل لان ابدا ماجنت اتخيل نفسي انو ابدي اترجم بكتاب لان طبعا مو شي سهل و يحتاجلة اهواي وقت بس اني كدرت اسوي خلال هذه الأيام وطبعا راح أضل مستمرة عل هذا الشي حتى بعد التحدي لان صار روتين من يومي وراح اطور من نفسي أكثر وأكثر بهذا المجال
وبالنهاية احب اشكر كلمن ساهم بهذا التحدي وأولهم مرتضى التميمي وعلى تشجيعة النه وحماسة انو ايشوف تطوراتنه خلال التحدي واشكر كل الي بالكروب على حبهم للمساعدة وتشجيعهم خلال التحدي
ليست هناك تعليقات:
إرسال تعليق